E miz Du tremenet eo bet lakaet en-linenn ur pezh mell oberenn : dielloù an tudoniour ha yezhour Donatien Laurent : 136 enklask, ouzhpenn 600 eurvezh a enrolladennoù bet graet gantañ adalek 1956 betek fin ar bloavezhioù 1970. Klevet vo Donatien Laurent, Ifig Troadeg, Yann-Bêr Piriou ha Gilles Goyat evit lakaat ac'hanomp da zizoleiñ an dastumad dielloù-mañ lakaet e kerzh an holl a-drugarez d'ur c'henlabour etre Donatien Laurent, ar CRBC hag ar gevredigezh Dastum.

An abadenn-mañ a zo un digarez ivez da lakaat ar gaoz war raktresoù liesseurt ar gevredigezh BCD-Sevenadurioù. Ganti e vez graet war-dro ar porched Bretania, ur benveg lañset daou vloaz 'zo war Internet, hag a ro an tu d'ar Vretoned da c'hoût hiroc'h diwar-benn o bro war tachennoù an istor, ar yezh, ar glad... Ouzhpenn lakaat fichennoù-titouroù diwar-benn an dielloù a vez graet ganto : evit lakaat war-wel tammoù dielloù 'zo ha lakaat an dud da gompren gwelloc'h istor ar vro e vez prientet teuliadoù tematek, hag a zo talvoudus evit kompren an istor hag an dielloù tolpet gant Bretania. Ar miz-mañ e vez kavet war Bretania un teuliad diwar-benn un darvoud c'hoarvezet e Roazhon hag en deus roet lañs d'an Dispac'h gall : 'se oa e miz Genver 1789 hag anvet eo "Devezh al lerennoù".

BCD/Sevenadurioù a zo ur gevredigezh a labour da sevel raktresoù ha da liammañ an energiezhioù evit kensevel ostilhoù da dreuzskas sevenadur Breizh. Met ur benveg-sikour eo ivez. Gellout a reer mont betek an Oriant da ginnig pe da c'houlenn sikour ouzh BCD evit mont betek penn gant ur mennozh. Sed aze ar pezh a oa bet graet gant Kristian Ar Braz deus Blaz Produksion a gont deomp istor e raktres.

Version du player désirée.

Code à insérer dans vos pages :

Résultat obtenu :